شد عمران فكه، وتألمت عيناه. _ والله ما كنت أقصد أوصلها لكده. صمت لحظة، ثم قال بثبات:
_ وأنا بوعدك... هاخد حقها من كل واحد أذاها، حتى لو من نفسي.

انسابت دمعة أخرى من عينيها. نهض عمران، ثم جلس على المقعد المقابل لها، وانحنى قليلًا نحوها. _ عايزك تثقي فيا يا طنط وفاء. ترددت لحظة قبل أن ترفع عينيها إليه. _ ليلى مش رخيصة عندي علشان حد يقلل منها، ومش هسمح لحد يشوفها غير بالصورة اللي تستحقها. ثم ابتسم ابتسامة صغيرة رغم الألم. _ وبوعدك... هتنزل البلد، والناس كلها هتعرف مين ليلى. وهتفضل سيرتها بينهم بالاحترام والأدب اللي هي تستحقه.

تغيرت ملامح وفاء قليلًا، وشعرت لأول مرة أن قلبها يستطيع أن يهدأ. لكن سؤالًا ظل عالقًا بداخلها. قالته بعد تردد:
_ أنتَ فعلًا بتحبها يا ابني؟ رفع حاجبه، فتابعت:
_ ولا فرحان بيها علشان نوع جديد مش موجود في دايرتك؟ ظل ينظر إليها لحظات، ثم خرجت منه ابتسامة موجوعة. _ حضرتك شايفة إيه؟ تنهدت وفاء، وقالت:
_ أنا مبقتش أشوف يا ابني... ثم وضعت يدها على صدـ,,ـــرها. _ من يوم اللي حصل لبنتي، عيني مبقتش تشوف غير خوفها ووجعها.

رفعت عينيها إليه. _ كل اللي بطلبه منك... لو فعلًا بتحبها، أو حتى لو مش بتحبها... بلاش تكسر قلبها. صمت عمران. _ ليلى لسه عود أخضر. مشافتش من الدنيا غير البراءة، وفجأة براءتها اتحولت لوجع واتّهامات ونظرات ناس. ارتجف صوتها. _ رجاءً يا ابني... اعتبرني واحدة لجأت لك علشان ضعيفة ومكسورة. بلاش توجع بنتي. أطلق عمران زفرة طويلة، وأطرق رأسه للحظات. ثم رفع عينيه إليها وقال بصدق موجع:
_ طيب أثبت لك إزاي إنها أغلى من روحي؟

تأملته وفاء طويلًا... هذه المرة لم تبحث في كلماته عن تبرير، بل بحثت في عينيه عن الكذب. ولم تجد. ثم همست:
_ يعني... أنتَ بتحبها بجد؟ وعايز تتجوزها؟ ضحك عمران بخفة، وسط حزنه. _ بحبها جدًا... جدًا. ثم أردف وهو يهز رأسه:
_ وأنا متجوزها أصلًا يا طنط... حضرتك نسيتي ولا إيه؟ المفروض تدعي لنا بالرفاء والبنين، ولا حضرتك مش عايزة سعادتنا؟ خرجت تنهيدة مطمئنة رغم دموعها. _ هو فيه أم ما تتمنّاش سعادة بنتها؟

مسحت دموعها، وقالت بحنان:
_ ليلى دي روحي يا ابني... ربنا يسعدكم، ويرزقكم بالذرية اللي تملى قلوبكم رضا وحنان. ابتسم عمران. _ اللهم آمين... ويهدي لي بنت حضرتك. ضحكت وفاء أخيرًا، وقد شعرت أن حملًا ثقيلًا انزاح عن قلبها. ثم قالت وهي تنهض:
_ بنتي طيبة وبريئة... وبتحبك أوي. أول مرة قلبها يدق، وغيرانة شوية... معلش، استحملها. ابتسم عمران. _ بستحمل والله. _ وإياك تزعلها. _ حاضر. _ وإياك تسيبها تنام وهي زعلانة.

ضحك بخفة. _ دي محتاجة توصية تانية. ابتسمت وفاء، ثم قالت:
_ أنا اطمنت على ليلى. هرجع عند فريد، هو مضايق وحاسس إنه قصر معاها... يبقى أرضيه بكلمتين، مهما كان أخوها. هز عمران رأسه. _ أنا بحترم فريد جدًا، وسايبه يهدى بس.

وبعد كده هنتكلم أكيد. اتجهت وفاء نحو الباب، ثم توقفت والتفتت إليه. _ خلي بالك على ليلى. نظر إليها عمران بثبات. _ حضرتك مش محتاجة توصيني. ابتسمت، ودعت له من قلبها:
_ ربنا يسعدك يا ابني، ويطمن قلبك زي ما طمنتني.