سمعت حسام يقول وإنت متأكد إنها مش هتعرف موضوع الورق؟ كريم اتوتر. اسكت. أنا بس بسأل. قلتلك اسكت! وبعدين حصل صمت. أنا كنت قاعدة على السرير، والموبايل في إيدي. ووقتها فهمت إن فيه سر أكبر من الدين. تاني يوم الصبح، سمر دخلت عليا. ندى، تيجي معايا السوبر ماركت؟ طبعًا. قالت وهي بتضحك خدي كارت كريم.
بصيتلها. ليه؟ قال لي استخدميه في طلبات البيت. قلت حاضر. ركبت معاها. وفي الطريق، قالت كريم بيحبك أوي على فكرة. بصيت من الشباك. عارفة. وإحنا كلنا عايزين مصلحتك. ابتسمت. وأنا كمان. وصلنا السوبر ماركت. وأنا بشتري، سمر بدأت تزود حاجات. منظفات. أكل. لحوم. أجهزة صغيرة للمطبخ. قلت دي كلها ضرورية؟ قالت ما هو كريم قال نجهز البيت. وافقت. لكن بدل ما أدفع بالكارت، قلت للكاشير لو سمحت، ممكن فاتورتين؟
سمر بصتلي. ليه؟ عشان أعرف مصاريف الأكل لوحدها والمنظفات لوحدها. هزت كتفها. براحتك. دفعت بالكارت. لكن قبل ما نرجع، عملت حاجة تانية. بعت لكريم رسالة إجمالي مشتريات البيت النهارده ٧٤٥٠ جنيه. أبقى حولهم على حسابي عشان ما يحصلش لخبطة. ما ردش. بعد عشر دقايق ليه؟ كتبت عشان أكون منظمة. رد خليهم عليا. ابتسمت. تمام. رجعنا البيت. بعد أقل من ساعة، كريم دخل عليا.
ندى. نعم؟ إنتِ ليه بعتالي المصاريف؟ عشان الحساب. إحنا بينا حساب؟ بصيتله في عينه. لأ. سكت. وبعدين ابتسم. طب خلاص. قرب مني. على فكرة، أنا محتاج منك خدمة. قلت قول. ال ألف اللي معاكي... عملت نفسي اتفاجئت. مالهم؟ ممكن نستلف منهم شوية؟ وهنا عرفت إن اللحظة وصلت. قلت ليه؟ عندي التزام لازم يتدفع.
قد إيه؟ حوالي خمسين ألف. قلت بهدوء التزام إيه؟ اتوتر. شغل. شغل إيه؟ يا ندى، هو تحقيق؟ ابتسمت. لأ. بس دي فلوسنا. قال بسرعة فلوسك إنتِ. بالظبط. سكت. وبعدين قال يعني مش هتساعديني؟ بصيتله. لو قلتلي الحقيقة، أساعدك. وجهه اتغير. حقيقة إيه؟ طلعت موبايلي. فتحت أول سكرين شوت. وقلت زي مثلًا إنك مخطط للموضوع ده من سبع شهور؟ وشه اصفر.
إنتِ بتتكلمي عن إيه؟ حطيت الموبايل قدامه. قرأ الرسالة. وبعدين التانية. والتالتة. ما نطقش. قلت أكمل؟ قال بصوت ضعيف ندى... أكمل؟ سكت. فقلت عرفت إنك إنت وحسام وسمر متفقين إني أطبخ وأنضف عشان توفروا فلوس الفندق. سكت. وعرفت إنكم عارفين إني محوشة ستين ألف. سكت. وعرفت إنك كنت ناوي تاخدهم عشان تسدد دين. هنا انفجر ده مش دين! وقفت. أمال إيه؟
سكت ثواني. وبعدين قال حسام داخل في جمعية ومش قادر يدفع. ضحكت بسخرية. يعني إنت كنت هتدفع دين أخوك بفلوسي؟ كنت هرجعهملك! إمتى؟ ما ردش. إمتى يا كريم؟ فضل ساكت. قلت طب اسألني سؤال. إيه؟ إنت كنت ناوي تقوللي الحقيقة إمتى؟ ما ردش. قبل ما تاخد الفلوس؟ ولا بعد ما تخلصها؟ في اللحظة دي الباب اتفتح. حسام دخل. في إيه؟ بصيتله. تعالى. عندي سؤال ليك.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.